Jean-Sébastien F.

Nou, k dou t in mien mouderstoal. k Bin Frits en k bin geboren en getogen in Hogezaand-Sapmeer; k schrief onder pseudoniem. k Bin amateur dichter, men zegt ook wel riemseloar. In 2012 verzörgt Hogezaand-Sapmeer weer d Grunneger Schriefwedstried. Gemainte Hogezaand-Sapmeer dut dat in d even-joaren, d Gemainte Slochtern dut dat in d on-even joaren. Ook dit joar dou k weer mit, dit joar veur t eerst mit n verhoal. Mien schrieversverleden: k Begon mit riemsels schrieven in Meert 1983. Bepoalde luu, zeg moar goie bekinden van mie, dij zeden -toun in 1979- as k van mien problemen en zörgen (k was overspannen) oaf wol kommen, den kon k beste t van mie oafschrieven. k Heb dij minsen in t gezicht uutlacht. Totdat k in Meert 1983, kört noa n reloatsie, heb k mien piene deur middels woorden aan t papier touvertraauwd. Toun k t overlas, bleek dat merendouls riemsels te wezen. Vanoaf dij tied bin k meer en meer schrieven goan. k Heb zulfs probairt n auto-biografie te schrieven, mor k kwam nait verder den hoofdstuk drij. Volgens aandern, schrievers van noam, deed k t goud. Mor veur miezulf kon k dij druk nait aan. Nee, k hoal t bie schrieven van riemsels en sinds kört klaine verhoaltjes. Én, oaf en tou riemsels en (buurt)berichten op Buurtlink.nl; Buurtproatje van Buurtverain Gorecht; Samenspraak van de NL's Gereformeerde kerk; én veur vrunden lain k mien handschrift uut veur geschreven herinneringskoarten; Verder bin k sinds Maai (Mei) 2006 mitlied van Kunstgaang Kaampke in Steem (Stedum; Mor in 2009 heb k mie oetschrieven loaten. k Schreef meer op Buurtlink, dan dat k aan t riemseln toukwam). Dat is kommen deurdat k in datzulfde joar (2006) n 3'e pries bie de Grunneger Schriefwedstried wonnen haar. Zodounde wui k uutnuigd deur Kunstgaang Kaampke: zai vruigen of k midlied worden wol. k Zee: "Dat dou k! Dij gelegenhaid mag k mie nait ontgoan loaten!" Nou bin k wéér twij joaren verder en k heb t gevoul of doar ain vanuut de verte mie op t steert trapt het. k Wait nait wanneer dat begonnen is, mor nou k schrief elke dag wel n stuk of 1 tot 3 mitdoulns of berichten. Ie kennen zo aal nait bedenken, over ain doezend en twij onderwaarpen. Mor wel hoofdzoaklek alle onderwaarpen wat te moaken het mit Hogezaand-Sapmeer. Aander onderwaarpen wat mie nog aal aantrekt het, is d Waddenzee mit doarin t flora en fauna. t Braait zuch van doaruut verder over d rest van dizze wereld, as t mor te moaken het mit d flora en d fauna (k heb doar n zwak in). Verder gait interesses ook uut noar politiek in Nederland: veuraal d leste tied over d windmolens. Nou is doar t Nationoal Krities Platförm Windenergie, dij zuch falikant tegen d windmölens ploatst het. Goud, t mag den t uutzicht smereg moaken, mor dat is den ook t ainegste. Schoner stroom kennen n mins nait kriegen, op zunne-energie noa den. Zunne-energie is t schoonst van alle energie-vörms om stroom te kriegen. Mor om dij solar-cellen op joen dak te loaten ploatsen, kost handenvol geld. Mor goud, ook hier bie 'mien profiel' bliekt ook alweer, bin k ainmoal aan t schrieven, den hol k bienoa nait meer op. Mor veur vandoage heb k genogte over miezulf kwebbelt: d volgende moal meer! Mor wanneer aine wat het, woarover hai/zai mit mie doarover winst te schrieven, den stoa k doarveur open. Mien email is: jeansebastien.frits@ymail.com